Ibibanza Abanyamerika bakorera mu Burundi batarekuriwe kujamwo

0

Igihugu ca Reta zunzubumwe za Amerika kimenyesha imiryango y’abakorera Reta zunze ubumwe za Amerika mu Burundi, hamwe n’abandi bakozi bose b’ubuserukizi bwa Amerika mu Burundi badakenewe cane, ko bosubira mu Burundi, ariko bakabwirwa ibibanza badakwiye kujamwo.

Uburenganzira bw’umwidegemvyo w’ugutembera n’ugukorera mu Burundi ku Banyamerika utanzwe inyuma y’ingingo yari yafashwe kw’igenekerezo rya 13 Kigarama 2015, aho iyo ngingo yasaba imiryango y’Abanyamerika kuva mu Burundi, bitewe n’ihungabana ry’umutekano ryibonekeza mu Burundi.

bdiew

Mw’itangazo ryasohotse kuri uwu wa gatanu, Reta ya Amerika imenyesha ko abana batarakwiza imyaka 18 hamwe n’imiryango y’abakorera Amerika mu Burundi, badafise imirimo bakorera Amerika, ko batemerewe gusubira mu Burundi.

N’aho uwo mwidegemvyo watanzwe, Abanyamerika bashaka kuja mu Burundi basabwa gukurikirana ibivugwa mu binyamakuru, gukurikirana ibirangamisi vy’indege zija mu Burundi, hamwe n’ukuraba amakuru atangwa n’ubuserukizi bwa Amerika mu Burundi, mu bijanye n’umutekano, amakuru acishwa ku rubuga ngurukanabumenyi (Internet).

Iryo tangazo rya Reta ya Amerika risaba abakozi b’ubuserukizi bwa Amerika mu Burundi kudatembera hanze y’igisagara ca Bujumbura mu masaha y’umugoroba, bongere birinde kuja mu makaratiye ya Kamenge, Musaga, Ngagara, Mutakura, Cibitoke hamwe na Nyakabiga.