Umusore w’imyaka 27 yiyahuye kubera akarenganyo akorerwa n’umuporisi

0

Umusore azwi kw’izina rya Samuel NIZIGIYUKWAYO yapfuye yiyashuye kubera akarenganyo n’agatotezo avuga ko agirirwa n’umuporisi akorera kuri SOGEMAC. Uwo musore yikatishije urwembe mu gihe umuporisi yariko amutwara kumupfunga.

Nk’igihe c’isaha zine z’agatondo ko kuri uwu wa gatatu, mu gisagara ca Bujumbura, hafi y’aho bita kuri BATA, umuporisi yafashe umwe mu bantu badandaza amaterefone. Abanyagihugu babibonye bavuga ko uwo muporisi yamufashe akorera aho bita kuri SOGEMAC, akaba yari yabwiye uwo musore ko uko amubonye azokwama amufata. Samuel NIZIGIYUKWAYO yaragerageje kumusaba ikigongwe uwo muporisi aramwankira, nk’uko ababibonye babivuga.

pis

Uwo yari afashwe yaridoze avuga ko yama afatwa incuro nyinshi, agapfungwa akuwe mu bandi bidegemvya, mbere akavuga ko ava mu gasho abanje gutanga amafaranga. Uwo musore niho yakora mu mufuko w’impuzu yiwe, akuramwo urwembe, aca acagagura imitsi yo kw’izosi ryiwe. Imodoka rusehabaniha yaramutwaye kwa muganga, ariko ubuzima bwiwe bukaba butashoboye kurokoka.

Samuel NIZIGIYUKWAYO yari afise imyaka 27, akaba yaba muri zone ya Kamenge mu gisagara ca Bujumbura, ariko yari imvukira yo mu ntara ya Gitega.