Umushikiranganji w’ubutungane aragabisha abacamanza barya ibiture

0

Mu rugendo yagize muri sentare zikukira komine Ntahangwa kur’uyu wa kabiri, umushikiranganji w’ubutungane Aimée Laurentine Kanyana, mu nama yagiranye n’abacamanza yarabamenyesheje ko bategerezwa kuvavanura n’ingeso mbi yo gusaba ibiturire ababituye. Akaba yaradomyeko urutoke sentare y’intango ya Kinama na sentare y’intango ya Buterere.

Umushikiranganji w’Ubutungane, Aimée Laurentine Kanyana, yabasavye gutera kugikumu kurupapuro rwo kwiyemeza kutarya  ibiturire, uwo mushikiranganji yarabasavye kuja mu mashirahamwe yo kuziganya no kuguranana kugira bimare ubukene. Abacamanza nabo bakaba baramenyesheje ko bakora ari bake arinaco gituma amadosiye ateba guhera.

Aimée Laurentine Kanyana yarasavye abacamanza ko bonyarutsa amadosiye ajanye n’amatati yaduka mu miryango hamwe n’amatati ari hagati y’abapanze amazu batariha amazu babayemwo. Akavuga ko ayo madosiye atarakwiye gushika hejuru muri sentare ntahinyuzwa.