Urwaruka rw’uburundi rugiye gutangura guhabwa inyigisho za gisirikare mu kiringo c’umwaka umwe maze ruheze rwikorweko n’ico gisoda nyene mu gihe bizoba bikenewe. Hakazoshingwa urwego rwitwa «FRAD»(Force de réserve et d-appui au développement) mu rurimi rw’igifaransa, urwo narwo ruzoba rugizwe n-urwo rwaruka ruzoba rwaronkejwe izo nyigisho, abahoze ku rugamba hamwe n-abakukuruke . Biri mu nteguro y’itegeko rigenga urwego rw’igisirikare c’uburundi umushikiranganji wo kwivuna abansi Alain Tribert Mutabazi yari yagiye gusigurira abashingamateka kuri uyu wa mbere.
Bamwe mu bashingamateka bakaba banegura urwo rwego rushasha rwa FRAD, Kubw-umushingamateka Agathon Rwasa ,abona ko urwo rwego ibikorwa vyarwo biteye amakenga agashikiriza ko igenzurwa ry-urwo rwego rishobora gutera ikibazo canke ibikorwa bashobora gutumwa. Umushingamateka Zachée Misago aturuka mu mugambwe CNDD-FDD yatowe mu ntara ya Makamba wewe amenyesha ko urwo rwego rwari rukwiye kujamwo abasubijwe mu buzima busanzwe hamwe n-abakukuruke gusa kuko aribo basanzwe bazwi n-igisoda.
Tubamenyeshe ko mw-iyo nteguro nshasha izoba igiye kugenga urwego FRAD, abakukuruke hamwe n-abasubijwe mu buzima busanzwe bazohembwa agashahara ariko urwaruka ruzoba ruriko rukwirikirana izo nyigisho za gisirikare ruzofungurirwa, ruhabwe aho rurara, rwambikwe hamwe no kuvuzwa bongere bahabwe utufaranga tubafasha mu kwikenura nko kugura umuti w-ikirato, w-amenyo , agasabuni,…
Recent Comments