Imigambwe munani irashima uko igiporisi cifashe kuwa 8 ntwarante igihe hibonekeza intureka hagati y’igiporisi n’abanywanyi b’imigambwe MSD hamwe n’abakenyezi bahurikiye mu mugambwe UPRONA. Iyo migambwe iratera ivyatsi inyifato y’abo banywanyi biyo migambwe kuko ku bwabo baragumutse.
Imigambwe PIEBU,PSP,MSP Inkinzo, FROLINA ,KAZE FDD PMP na RPB yatunganije ikiganiro ku banditsi n’abamenyeshamakuru kugira berekane aho bagaze ku bimaze iminsi biba mu gihugu c’Uburundi. Iyo migambwe yahagaze ahanini ku vyabaye ku munsi wa gatandatu igenekerezo rya 8 Ntwarante 2014, mu mishamirino yabaye hagati y’igiporisi n’abanywanyi b’umugambwe MSD, hamwe nabakenyezi bahurikiye mu mugambwe UPRONA muri UFB (Union des Femmes Burundaises).
Iyo migambwe uko ari munani iratera ivyatsi inyifato yaranze iyo migambwe uko ari ibiri. Kubwabo bakabigereranya n’aya migumuko yibonekeje mu bihugu vy’abarabu
Iyo migambwe uko ari munani yaciye igirako ishimira igiporisi kuko co cavyifashemwo neza ku ngingo yaraye ifashwe yo guhagarika umugambwe MSD mu kiringo c’amezi 4. Ku bwabo umushikiranganji yaciye inkoni ngufi kuyo bategerezwa kuronka.
Ku vyerekeye naho ibiherutswe gushikirizwa n’umukuru wa Reta Zunzubumwe z’Amerika uwishuye kw’izina ry’abagenzi be muri ico kiganiro ku bamenyeshamakuru, amenyesha ko ari uburenganzira bw’uwo mutegetsi kugira ico ashikirije. Ariko akamenyesha ko igihugu c’Uburundi cikukiye kandi gifise amategeko akigenga nk’ibwirizwa shingiro n’ayandi,mu gihe bikenewe ko umukuru w’igihugu afata ingingo ntarinda guhagarara kubiba vyashikirijwe n’uwo mukuru w’igihugu ca Reta Zunzubumwe z’Amerika ahubwo ahagarara ku mategeko akabaza ico avuga.
Tubamenyeshe rero ko iyo migambwe ari PIEBU,PSP,MSP Inkinzo, FROLINA ,KAZE FDD PMP na RPB.
Credit : Igihe
Recent Comments