Ubutungane bw-uburundi bwanse kurekura Germain Rukuki, umwe mubaharanira agateka ka zina muntu. Uyo nawe akaba yaheruka kugabanirizwa igihano kiva ku gifungo c-imyaka 32 kija ku mwaka 1, vyari bitegekanijwe ko afungurwa ku musi wa gatanu w-indwi twaraye tusozeye ariko abamwunganira bamenyesha ko habonetse irindi tegeko ribwira uwutwara ibohero rya Ngozi, asanzwe amazemwo imyaka 4 afunzwe, kutubahiriza iyo ngingo.
Ku musi wa gatanu w-indwi twaraye tusozeye, niho intumwa ya sentare nkuru ya Ntahangwa, igisata c-iyungururizo yaja gushikiriza Germain Rukuki mw-ibohero rikuru rya Ngozi, urupapuro rumumenyesha ko igihano c-umwaka umwe yakatiwe yakirangije.
Abaharanira agateka ka zina muntu hamwe n-abahinga muvy-amategeko bariyamiriza ico bita ˮihohoterwa rikabije ‟ kuko uwabo ubu Rukuki afunzwe binyuranye n-amategeko. Abasanzwe baburanira Germain Rukuki bavuga ko bagiye mu biro vy-uwutwara iryo bohoro rya Ngozi Rukuki yaramazemwo imyaka 4 afunzwe gusaba urupapuro rumuha uburenganzira bwo gusohoka ibohero bita ˮbillet d-elargissement‟. Mu gihe uwo nawe yariko yitegura kubaha urwo ruhusha, yaciye abamenyesha ko nawene yahawe itegeko n-ubugenduzi bukuru bw-amabohero rimubwira ko yoba arabangiriye gusohora mw-ibohero Rukuki.
Tubamenyeshe ko Sentare y-iyungururizo yari yagize umwere Germain Rukuki ku vyaha bitatu: Kuja mu midugararo igamije gutembagaza ubutegetsi, guhungabanya umutekano w-igihugu hamwe no gushaka kugirira nabi umukuru w-igihugu. Yamara uwo asanzwe yakorera ishirahamwe ACAT Burundi, yagumanye icaha kimwe mw-ivyo bitatu yagirizwa ubwa mbere, ico naco nico kugarariza, kigahanishwa umunyororo w-umwaka umwe.
Twobibutsa ko atari ubwambere uwurekurwa n-ubutungane maze mu nyuma akagumizwa mw-ibohero .Akarorero ka hagufi ni dosiye yavugishije benshi y-umukenyezi Christa Kaneza afungiwe mw-ibohero rikuru rya Mpimba yagirizwa kuba afisemwo uruhara mw-urupfu rw-umugabo wiwe.
Recent Comments