Igihugu c-uburundi kiza mu bihugu bitatu vyanyuma mu cegeranyo c-umwaka w-2020 cerekana ingene ibihugu vyo muri Afrika bituma abashoramari bazana imitahe mu migambi y-ivyo bihugu. Biri mu cegeranyo c-ibanki yo muri Afrika y-epfo Rand Marchant Bank.
Mu cegeranyo gisohoka ukwo umwaka utashe ciswe where to invest in Africa 2020 , Igihugu c-uburundi kiri mu kibanza ca 52 n-amanota 2,3% kikaza imbere y-igihugu ca Somaliya hamwe n-igihugu ca Guinnée Equatoriale . Ico cegeranyo c-ibanki Rand Merchant Bank cisunga ibiharuro vy-abahinga b-amashirahamwe yigenga hamwe na mpuzamakungu mu bisata bitandukanye bigize ubuzima bw-igihugu. Kikaba cerekana urugero rw-ibihugu vyo muri Afrika biriko mu gutuma abashoramari babikoreramwo gutyo bakamenya ibihugu bashiramwo imitahe yabo.
Nkuko ico cegeranyo kivyerekana, uretse ko ikiza ca Covid-19 cateye isibe mu bijanye n-ubutunzi bw-ibihugu vyo kw-isi n-umugabane wa Afrika urimwo, amanota mu bijanye nuko amakori atangishwa hamwe n-icuka gishobora gutuma abantu barangura ibikorwa vyabo ngo nivyo bikuru bikuru bituma abashoramari baza mu gihugu ari benshi.
Tubibutse ko kw-igenekerezo rya 25 myandagaro 2021, umukuru w-igihugu c-uburundi Varisito Ndayishimiye wenyene ubwiwe yaremeje ko ubutegetsi bwiwe ibangamiwe n-akarenganyo hamwe n-igiturire , ari navyo biri mu bituma abarwizatunga b-abanyamahanga batizera uburundi .
Ibanki Rand Merchant Bank yerekana ko ibihugu bitatu vyo mu muryango wo muri Afrika y-ubuseruko arivyo bimaze kugera muri cumi vya mbere mu bijanye no gutuma abashoramari bitabira imigambi yavyo. Ivyo bihugu navyo ni igihugu c-urwanda kiza ku mwanya wa kane, igihugu ca Kenya kiri mu kibanza c-icenda hamwe rero na Tanzaniya iza ku mwanya w-icumi.
Recent Comments