Igisirikare c-uburundi kimenyesha ko gitewe impungenge n-imirwi y-abitwaje ibirwanisho ishobora gutera uburundi ivuye mu bihugu bibanyi biri arivyo u Rwanda na Congo, canke igatera ivyo bihugu iciye ku butaka bw-uburundi.
Nkuko tubikesha iradiyo Ijwi rya Amerika, nuko igisirikare c-uburundi cirinde uwo mutekano muke, kimaze imisi gitunganya imibonano mu ma komine yose y-intara zihana urubibe n-ivyo bihugu bibanyi kugira gisigure amayeri yose iyo mirwi y-abarwanyi ikoresha haba mu kuresha abayijamwo canke mu kwinjiza ibirwanisho.
Intara zerekeye n-iyo mibonano ni zitanu: Muramvya, Cibitoke, Bubanza, umurwa mukuru w-ubutunzi Bujumbura hamwe n-intara ya Bujumbura-Rural. Imirwi itumirwa iruhande y-abagize inzego zo kwivuna abansi ni: Abakuru b-imitumba, abunguruza abantu bakoresheje amapikipiki hamwe n-amakinga, abarongoye amashure yisumbuye , abakukurutse mu gisirikare n-igipolisi , urwaruka ruhejeje amashure yisumbuye rutararonka akazi , abaserukira amadini n-imigambwe hamwe rero n-abaremeshakiyago bo ku misozi yose igize izo ntara zitanu.
Buramatari w-intara ya CIBITOKE, Careme Bizoza asaba abanyagihugu bose kwifata bakitwara nk-abajejwe umutekano aho kwiyumvira ko ari igikorwa c-abasirikare n-abapolisi gusa.
Recent Comments