Umukuru w-inama nshingamateka Daniel-Gélase Ndabirabe aheruka kumenyesha ko abakenyezi baharanira ivyo gutorana mu Burundi ata kindi bashaka atari ugutitura imico y-ikirundi. Abo nabo Gelase Ndabirabe avuga ko ata bandi ari abakenyezi bize kandi bakaba mu miji. Akongera akavuga ko abarundi bose atavyo bashaka kuko vyohava bivyara akarambaraye. Ivyo bikaba vyavuye mu matohoza Leta yakoze, nkuko abandanya abivuga uwo arongoye iyo nama nshingamateka y-uburundi. Uwo arongoye urwego rutora rukongera rukemeza amategeko y-igihugu yabivugiye mu ntara ya Muramvya igihe yariko agirisha inama mu mpera z-indwi iheze abarongoye amadini.
Ndabirabe ati :
ˮIbintu vyo gutorana ndaziko mu misi iheze vyahaye biravurwa cane mu miheze n-abakenyezi bamwe bamwe bo mu muji muga tuza gusanga ko ari abantu bize gusa babivuga kugira basambure imico y-abarundi. Muri Leta, baragerageje kubibaza abenegihugu bose baravuga bati Oya! Reka reka ! Nimwashiraho itegeko rituma abakenyezi, abakobwa batorana iwabo ati hazoba ingorane zidasanzwe. Ati honyene nubu baricana! Ati honyene ibaze ubu hamwe muciye mwemeza iryo tegeko ivyoca bishika?‟
Kubwa Daniel-Gélase Ndabirabe, ngo ntiharagera rero ko itegeko ryo gutorana rishirwaho kubera ko kwoba ari uguca kubiri n-imico y-abarundi.
ˮIbintu vyogutorana, ntitwanka abashiki bacu oya! Ariko ukwo imigenzo y-abarundi imeze ntiharagera aho twovuga ngo dushireho ibwirizwa ryo gutorana‟ Niko Ndabirabe abandanya asigura.
Twobibutsa ko ivyo vyashikirijwe n-umukuru w-inama nshingamateka y-uburundi vyibutsa amajambo yashikirijwe n-umuhisi Perezida Nkurunziza aho nawenyene yari yavuze ko atazigera ashiraho itegeko ryo gutorana ku bakenyezi n-abigeme.
Recent Comments