Mu bantu 800 bari bipimishije, Abangana 600 nibo batoweko umugera wa Covid-19 mu ntara ya Cibitoke guhera kw-igenekerezo rya 13 Kigarama gushika kurya 20 kigarama 2021. Ivyo bipimo bikaba vyatumye bitera ubwoba n-amakenga umurwi wari warungitswe mw-iyo ntara muri ico gikorwa co gupima uwo mugera.
«Birateye amakenga cane . Nkuko mubibona, ni hafi abantu nka bose bamaze kwandura. Ntitwari twiteze ko umusi umwe twoshikana ibitigiri nk-ibi vy-abanduye» Bivurwa n-abaforoma barungitswe mu gikorwa co gupima uwo mugera bavuganye n-ikinyamakuru Sos Medias Burundi.
Abari mw-ico gikorwa bamenyesha ko ibikoresho vyo gupima bihera ningoga kandi ko bakeneye kuronswa ibikoresho basanzwe bakoresha ku bwinshi kugira babandanye gupima igitigiri c-abantu badahengeshanya kuguma baza ari benshi. Abasanzwe bakorera mu gisata c-ubuvuzi bo ngaho mu ntara ya Cibitoke bashira ahabona itunganywa ry-igikorwa ritabereye mu kurwanya ico kiza.
«Turatahura ko ibibanza bidakwiye vyo kwugaraniramwo abantu banduye ku bitaro , ariko hari hakwiye gushirwaho imirwi y-abajejwe amagara y-abantu iza iragendagenda gukwirikiranira abarwaye mu mihana iwabo. Iyo bagiye iwabo ntibiyugarana kuko baguma bagendera mu bandi nkuko umenga ntacigeze kandi bakaba bariko baranduza abandi» uko niko bidoga bavuga.
Abarongoye intwaro hamwe n-ubuvuzi bahamagarira abantu kwubahiriza ingingo zafashwe zo kurwanya irandagata ry-umugera wa Covid-19. Abarwayi nabo basabwa kuguma biyugaraniye mu mihana iwabo mu gihe cose co gufata imiti kugira birinde kwandukiza abandi.
Recent Comments