Mu nama y-umutekano yabaye kuri uyu wa gatanu igenekerezo rya 9 Mukakaro 2021 ikoreshejwe na buramutari w-intara ya Bubanza, harafunditswe ingingo zitari nke zotuma umutekano utahungabanywa n-imirwi y-abitwaje ibirwanisho biboneka ko ishobora kwinjira mu Burundi iciye mw-iyo ntara ivuye mu gihugu kibanyi ca congo nk-uko vyibonekeje mu misi iheze. Abari bitavye iyo nama y-umutekano ya buramatari bari bagizwe ahanini n-abajejwe intwaro baturuka muri CNDD-FDD hamwe n-abanyamigambwe bo mw-iyo ntara.
Mu gutera intege uwo wese yotanga amakuru aho uwohungabanya umutekano yoba ari, agashimwe kari hagati y-ibihumbi ijana hamwe n-umumiriyoni w-amarundi niko kazotangwa.Ayo mafaranga akazotangwa n-imvukira mu ntumbero yo kubumbatira amahoro n-umutekano mu ntara yabo.
Nk-uko bivurwa n-abari bitavye iyo nama, Ako kamo ka buramatari ko kuzoshimira uwo wese yoranga aho umwansi ari , karakomewe amashi n-abari mw-iyo nama batari bake barwiriyemwo urwaruka rw-imbonerakure. Cleophas Nizigiyimana, buramatari w-iyo ntara yamenyesheje ko intara arongoye atakeneye kusubira kwumva yasubiye kudurumbanywa n-imirwi y-abitwaje ibirwanisho.
Mu ngingo zafatiwe mw-iyo nama, harimwo ko umuhana wose woba ufise twa dukaye tw-ingo bita ˮcahier de menage ‟ mu rurimi rw-igifaransa, hakaba kandi kumenya amamuko y-umushitsi yo kwibonekeza mu babanyi. Buramatari w-iyo ntara yarongeye kandi arasaba abarongoye imigambwe hamwe n-bajejwe intwaro ko boza baracunga abakukuruke mu gisirikare hamwe no mu gipolisi kuko ngo bama bagize uruhara mu gufasha abo bitwaje ibirwanisho iyo baje guhungabanya umutekano.
Umunyamabanga w-umugambwe CNDD-FDD mu ntara nawe yategetse urwaruka rw-imbonerakure ko rwoba magabo ngo ntibibagire ko bashoboye kufasha mu gusubiza inyuma abari bateye mw-iyo ntara mu myaka y-2018 hamwe n-2019. Asaba urwo rwaruka ko n-ubu umwansi atari kure ko kandi ashobora kuza yahinduye imikenyuro yo kurwana.
Recent Comments