Inyuma yaho itegeko ritegekanya amahera Leta izokoresha kuva kuwa 1 Mukakaro 2021 gushika kuwa 30 Ruheshi 2022 ritereweko umukono n-umukuru w-igihugu , Uwurongoye ishirahamwe PARCEM , Faustin Ndikumana asaba ndetse anahimiriza Leta ko itokwijajara kw-iduza ry-amakori ari muhazova amahera menshi azokoreshwa mw-ico kiringo, ko ahubwo yokwihutira kurondera amafaranga mvamakungu ngo ashobora gusahiriza ubutunzi bw-igihugu kugira umunyagihugu ntabandanye avunika. Kubwa Faustin Ndikumana, ngo Leta iravye nabi irashobora kutaronka ayo mahera azova mw-ayo makori nkuko yari vyiteze.
ˮNubwo ayo makori yoba yiyongereye, arya mafaranga Leta ivuga ko izotoza ikongera ikazokoresha ashika ku miriyaridi 1600 , urumva si n-umumiriyaridi w-amadorare. Ni ukuvuga ko mu Burundi ukwo bimeze kwose ntiturakwiza amatagisi tutoza ashobora kungana n-umumiriyaridi w-amadorare , ukwo uduza cane amatagisi haratinda hakagera ko bibuza aho abanyagihugu bayakura cane cane aho uza kusanga abantu batabandanije bagura ivyo bariko baragura canke abariko barinanata ngo barwize umwimbu kubera amatagisi aguma ababera menshi . uravye abatanga amatagisi n-ubukene buri mu Burundi biraboneka ko ari ingorane idasanzwe ihari. Mugabo amahera Leta yoyo irayakeneye kuko naho yoba ikeneye kuriha ayo madeni , yategerezwa kuriha nande? Arihwa n-abarundi ‟
Uwo arongoye PARCEM asaba kandi ko umushikiranganji w-ikigega ca Leta yogira inguvu kutaguma yiyumvira ko amahera azokoreshwa mw-uw-umwaka azova mu matagisi n-amakori kandi ubutunzi mu barundi butariko buriyongera. Ahubwo ngo umushikiranganji yige izindi nzira zishoboka zose harimwo kurondera amafaranga mvamakungu yoza asahiriza ayo Leta izoba yakuye mw-ayo matagisi n-amakori.
Recent Comments