Inyuma y’aho amazi ya Tanganyika yononeye ibitari bike mu gisagara ca Bujumbura nomu ntara ya Rumonge, izindi nzuzi zo mu kiyaya c’imbo zirabangamiye ababa hafi yazo.
Abantu bariko barateshwa amazu yabo bahungira ku bibanza biri hafi y’ikibuga c’indege bitarashikirwa n’ayo mazi barondera aho boshinga uduhema.
Abajejwe intwaro muri izo zone basaba ubufasha kuko imiryango ntikigira aho iba.
Aho ntitwokwibagira amashure yugaye , amashengero, ibigo vya leta canke ivy’abikorera utwabo nk’amavuriro n’ibindi uyumusi bitakigira aho bikorera.
Uruzi Kajeke nagwo ruriko ruratangura kwonona ibitari bike muri komine Gihanga rwarifatiye ibarabara rya 5 (route transversale) ryaciye ryugagwa n’abajejwe intwaro haciye iminsi 3 ku mvo zo kurinda isanganya uwo wese yohaca. Uduserege twasohora ayo mazi ubu twarazivye, inkingi zari zihari zose zirabomagurika.
 Amazu yegereye aho urwo ruzi ruca arashobora kugeramirwa mugihe ibikorwa vyo kurusubiza mu nzira yarwo biriko birategurwa vyoteba na cane cane ko bisaba uburyo bwinshi.
 Ibikorwa vyo kwubaka urugomero kuri Kajeke vyahagaze, ngo yari inyishu nzima kuri urwo ruzi ruca rwiha izindi nzira mu gihe c’imvura.
Recent Comments