Kuri uyu wa 11/12/2015 , amakuru adushikira aremeza ingabo z’igihugu isinzi zagandaguwe mu bitero vyaraye bikongera bikirirwa mu gisagara ca Bujumbura no mu bice bitandukanye vy’igihugu c’u Burundi .
Kubw’umuvugizi w’abasirikare ” Col Gaspard Baratuza ; igisirikare kikaba kitatakaje n’umwe ! Aha Baratuza akaba yagwije n’ubusa ingabo zishika zine tumaze kumenya ko zaguye muri ivyo bitero aho abasoda bazwi ku mazina ya Gronde ( yari asanzwe yiga igisata ca PSYCHOLOGIE mu mwaka wa 3 ) na Innocent ( yari asanzwe yiga ubuganga mu mwaka wa 3 ) ziri mu bagandaguriwe mw’ishure rya gisirikare ISCAM ( arizo z’izo mubona zitangura kuri iyo sanamu munsi ) ; mu gihe izindi ngabo z’igihugu zishika 2 zimaze kumenyekana ko zaguye mw’ikambi ya Ngagara ( umwe mu baguye mu Ngagara , isanamu munsi yambaye umwambaro w’igisoda ) .
Izindi ngabo isinzi zaguye mu bitero bidasanzwe vyakozwe kandi bikibandanya i Bujumbura no ku makambi y’u Burundi , nk’uko amakuru adushikira avyemeza . Ayo makuru yemeza ko hari n’abashika 3 mu bateye basize ubuzima muri iyo mirwano ; aho babiri bapfiriye mw’ishure rya gisirikare ISCAM , mu gihe uwundi mu bateye umwe yaguye mw’ikambi yo mu Ngagara .
Hakaba hatewe ikambi 5 arizo ikambi ya Ngagara , ya Base des Forces Armées ( BFA ) , ikambi ya Muha n’ikambi ya Mujejuru ; aho havugwa ko n’ibigwanisho isinzi vyibwe mu makambi ya Base , Muha , Iscam na Mujejuru . Ayo makuru nyene akemeza ko ikambi yo mu Ngagara itigeze yibwamwo inkoho , kuko igisirikare gisa n’icabatesheje batarabitwara .
Bikaba biboneka ko Gaspard Baratuza bikimugoye gato , kuko atarashobora kwiga guharura ibiziga vy’ingabo z’igihugu mu gihe zihona ariko akabirenzako uruho rw’amazi .
IGIHUGU KIRATEKANYE
Mu gihe kubwa Gaspard Baratuza yemeza ko igihugu gitekanye , aha akabikora mu kwidigadiga kuko bigaragara ko u Burundi buri mu ntambara kandi nubu ko umutekano utifashe neza.
Amakuru dukura mu Nyakabiga mu gisagara ca Bujumbura ; abaporisi babonye ayo imbwa yaboneye ku mugezi ku mutaga wejo , 11/12/2015 , aho baterwa bakarengerwa n’abantu batamenyekanye . Ayo makuru nyene yemeza ko abo baporisi bageze ku guhererwa n’amasasu baca bakoma akaruru batabaza , nk’uko abanyagihugu bo mu Nyakabiga bavyemeza ; hakaba haciye haza abasirikare gufasha abo baporisi bari bageramiwe aho mu Nyakabiga .
Twobibutsa ko muri ivyo bitero , abanyagihugu isinzi bakubaguwe cane aho vyari ibintu biteye ubwoba n’isoni aho hari abanyagihugu bamaze kumenyekana bashika hafi 2 bagandaguriwe ku Mutakura ataco bazira , mu gihe abandi banyagihugu bashika 3 bahejeje kugandagurwa muri iri joro mu Nyakabiga .
NTITURI IBIJUJU TWESE
Mu gihe hatewe amakambi y’igisirikare atandukanye yo mu gisagara ca Bujumbura no mu gihugu hagati , abanyagihugu benshi baribaza kw’ijambo yubahutse gushikirizwa na Gaspard Baratuza . Muri iryo jambo , Baratuza ati
” ABATEYE BASHAKA KUBOHOZA ABAFUNGWA BAFUNGIWE MU MPIMBA “.
Aha abarundi bakibaza bati , nimba vy’ukuri bashaka kubohoza abanyororo ;
1) abo bateye bateye mw’ikambi y’igisoda iri mu Ngagara ari uko bahaziga ibohero rya Mpimba ?
2) ikambi ya Mujejuru iri hejuru mw’i Jenda mu ntara ya Bujumbura – rural , boba bayiteye bahaziga ibohero rya Mpimba ?
Ivyo arivyo vyose ibihe bitubikiye vyinshi , kuko biragoye gushigikira iryo jambo kiretse nimba twobwirwa ko Mpimba yahindutse IBOHERO NGENDANWA .
INAMA YIHUTA YA ONU
Igihugu c’u Bufaransa casavye ko inama yihuta ya ONU yokorana ku Burundi , nk’uko tubikesha bamwe mu bategetsi b’ishirahamwe mpuzamakungu ONU .Nk’uko ayo makuru nyene avyemeza , iyo nama iraba uno musi aho bukera mu masaha ya sa kumi n’imwe y’igitondo ( dufatiye ku masaha y’abanyamerika ) .
Ibi bikaba bije mu gihe igihugu c’u Burundi kiri mu mirwano y’urutavanako aho abatari bake babandanya kwicwa, ababishoboye naho bakaba baguma bahunga kumvo zuko mu Burundi atamutekano uhari.
Recent Comments