Lata ya Angola iriyamiriza yivuye inyuma inyifato y’umuhari M23 ubandanya ugaba ibitero ntushake kubahiriza amasezerano yo guhagarika intambara.
N’inyuma yaho umuhari M23 wigaruriye akarere ka kalembe kari mu buraruko bwa kivu.
Mw’itangazo Leta ya Angola yasoye kuri uyu wa mbere igenekerezo rya 21 gitugutu 2024, Angola iriyamiriza ibitero bibandanya bikorwa n’umuhari M23 kandi harabaye ubwumvikane bwo guhagarika intambara ku mpande zompi.
Mw’itangazo Leta ya Angola igira iti:”iyi nyifato y’umuhari m23 iza isubiza inyuma utwigoro twose n’ivyasabwe mu nama y’abashikiranganji igira ya 30 hamwe n’ubwumvikane bwo guhagarika intambara bwatanguye kuja mu ngiro kw’igenekerezo rya 4 myandagaro 2024.Turiyamirije twivuye inyuma iyi nyifato atakindi igamije atari ugusubiza umugambi w’amahoro.”.
Leta ya Angola imenyesha ko igiye kubandanya ishigikira utwigoro twose mu gukemura ibibazo vy’umutekano biciye mu nzira y’ibiganiro vy’amahoro bishigikiwe na Prezida João Manuel Lourenço.
ibi Angola ibishikirije mu gihe kuri uyu wa mbere umuhari m23 ukoze ibitero ukigarurira akarere ka Kalembe kari muburaruko bwa kivu.
Recent Comments