Umugambwe Sahwanya Frodebu umenyesha ko uriko urakorerwa agatotezo.

Umugambwe Sahwanya Frodebu umenyesha ko uriko urakorerwa agatotezo n’umugambwe CNDD-Fdd ukoresheje urwaruka rw’imbonerakure.

Muri Frodebu bavuga ko bashobora kwivuna bibaye ngombwa naho bobo badashira imbere kwihora.

Nkuko biri mw’itangazo ryo kuwa 3 gitugutu 2024 rigaterwako umukono n’umukuru w’umugambwe Patrick Nkurunziza,umugambwe Frodebu umenyesha ko uriko urakorerwa agatotezo karenze n’umugambwe CNDD-FDD uri kubutegetsi ukoresheje urwaruka rw’imbonerakure.

Nkuko uwo mugambwe ubishikiriza muri iryo tangazo urwaruka rw’imbonerakure nirwo rutungwa agatoki mukunyuruza amabendera y’umugambwe Sahwanya Frodebu,ingoro z’umugambwe nazo zikabomorwa canke zikononwa n’izo mbonerakure.

Muri Sahwanya Frodebu bamenyesha ko bibaye ngombwa bashobora kwivuna naho bobo badashira imbere kwihora.

Umugambwe Sahwanya Frodebu urangiza usaba umushikiranganji w’intwaro yo hagati mu gihugu hamwe n’abajejwe ubutungane guhagarika vuba ako gatotezo uriko urakorerwa kuko akataretse kaba gasema.