Inani z’amasendika y’abakozi COSYBU naCSB zitewe impungenge n’iduga ry’ibiciro vy’ivyankenerwa bibandanya biduga ariko amikoro y’abakozi n’abarundi muri rusangi atisununura.
Mw’itangazo ryasohowe n’izo nani kuri uyu wa gatanu zishira ahabona akarorero k’ibipfungurwa vya nkenerwa nk’umuceri, ibiharage , intete z’ibigori , igitoro , ibinyobwa vy’ihinguriro BRARUDI hamwe n’ibindi,…Abarongoye izo nani bagasaba Leta gukora uko ishoboye kugira ibiciro bigume biri hasi. Izo nani kandi zisaba ko agashahara ko kwongerezwa maze Leta igafatira ku kungene ubuzima bwazimvye hamwe n’uko ifaranga ry’uburundi riguma ribandanya rita agaciro.
Celestin Nsavyimana arongoye COSYBU mu kiganiro yahaye bagenzi bacu ba Radiyo Bonesha FM yavuze ko adatahura ingene umushahara w’ifatiro muto ubaho ari amafaranga atarenga 180 kandi haciye imyaka 30 itegeko riwushinze. Agasaba ko uwo mushahara bita “SMIG” woshirwa ku bihe igihugu kigezemwo.
Recent Comments