Ku musi ugira 38 w-ibitero vy-ingabo z-uburusiya muri Ukraine, Abategetsi ba Ukraine batangaje kuri uyu wa gatandatu igenekerezo rya 2 Ndamukiza 2022 ko ibisagara vyose vyegereye umurwa mukuru wa Kiev vyasubiye mu minwe y-igisirikare c-ingabo za Ukraine. Ivyo bisagara bikaba vyari bimaze imisi biri mu minwe y-ingabo z-uburusiya.
Abicishije ku rubuga rwa Facebook,Icegera c-umushikiranganji wo kwivuna abansi wa Ukraine , Ganna Maliar yatangaje kuri uyu wa gatandatu ati :«Irpin,Boutcha, Gostomel hamwe n–uburere bwose bwegereye kiev bwarambuwe bukurwa mu minwe y–umwansi»
Ku muhingamo wo kuri uyu wa gatandatu, umuhanuzi mu biro vy-umukuru w-igihugu wa Ukraine yerekanye ko ingabo z-uburusiya zakuyeyo vyihuta mu burere bwa Kiev no mu micungararo yaho hamwe no mu bumanuko bwa Tcherniguiv, zifise intumbero yo kuja kwipanga ku bwinshi mu buseruko no mu bumanuko bwa Ukraine mu ntumbero yo kugumya uburere bumaze igihe bwarafashwe n-izo ngabo z-uburusiya.
Recent Comments