Nk’uko tubikesha itororokanirizo ry’amakuru ry’abafaransa AFP, umurwi w’abahinga washizweho na Perezida w’ubufaransa Emmanuel Macron ngo wige kubirego bivuga k’uruhara rw’ubufaransa rwagize mu Rwanda mu myaka yo hagati ya 1990 na 1994 waraye ushikirije icegeranyo aho abo bahinga bemeje ko Igihugu c’ubufaransa kirongowe na Perezida w’ico gihe Francois Miterrand cagizemwo uruhara runini muri jenoside yakorewe abatutsi yabaye mu Rwanda mu mwaka w’1994.
Kubiri mw-ico cegeranyo, harabonekamwo uko igihugu c’ubufaransa cakoranye cane na Leta ya perezida w’u Rwanda w’ico gihe Juvenal Habyarimana muvya gisirikare, muvya diplomasi, be na politike, harabonekamwo kandi ukuntu Ubufarasa bwica amatwi ntibufashe igihe abatutsi baguma bicwa imbere y’uko jenoside itangura nyezina ;eka no muri jenoside nyezina ingabo za Mitterand zari mu Rwanda zararorera aho gutabara naho zagiye kuza ziteba.
Tubamenyeshe ko inyuma y’ibirego vy’u Rwanda bwagiriza ubufaransa ko bwagizemwo uruhara mw’ijenoside yakorewe abatutsi ariho hatumye mu mwaka w’2019 perezida Emmanuel Macron ashiraho umurwi w’abahinga batohoze banakorereko kw’ivyo birego vy’u Rwanda mu ntumbero y’uko imibano iri hagati y’ivyo bihugu bibiri isubire kumera neza.
Igihugu c’u Rwanda naco nticatevye kugira ico kishikirije inyuma y’ico cegeranyo c’abo bahinga aho cashimye cane ico kikorwa cakozwe na Leta ya Macron ndetse u Rwanda narwo ruca rumenyesha ko rwiteguriye gusohora icegeranyo cakozwe n’iperereza ry’ico gihugu ndetse ko rwizeye cane ko ico cegeranyo cabwo kizoba kihuye cane nico c’abahinga baraye basohoye.
Recent Comments