Leta y’uburundi ntiyipfuza ko intumwa idasanzwe ya ONU muvy’agateka ka zina muntu ihonyoza ikirenga ku butaka bwayo.Leta yongeye kubigaragaza mu nama ya ONU igira iya 50 y’agateka ka zina muntu yakoranye kuri uyu wa gatatu.
Intumwa idasanzwe ya ONU iraba ibijanye n’agateka ka zina muntu mu Burundi Fortuné Zongo yagarutse kuvyo ivuga ko vyateye imbere mu gihugu nk’ikigongwe umukuru w’igihugu yahaye abanyororo barenga 5000, ifungurwa ry’abamenyeshamakuru n’abaharanira agateka ka zina muntu , ukwemerera gusubira gukorera mu Burundi ibimenyeshamakuru bimwe bimwe , ukuduzwa ipete kw’umurwi w’igihugu w’agateka ka zina muntu (CNIDH) hamwe n’ikurwaho ry’ibihano uburundi bwari bwafatiwe n’ubumwe bwa buraya na Leta Zunze ubumwe za Amerika. Ariko vyinshi muri ivyo vyabaye Fortuné Zongo ataratangura icese amabanga yiwe. Inyuma y’ukwemeza kwiwe mu mabanga kuwa mbere Ndamukiza, Inama ya ONU ijejwe agateka ka zina muntu ivuga ko uwo munya Burkina Faso yatanguye akazi nyezina kuwa mbere Rusama 2022.
Kuri uyu wa Gatatu, Fortuné Gaetan Zongo akaba yavuze kandi ko abategetsi b’uburundi bakwiye kwongereza inguvu mu bijanye no kurwanya ukudahana, ibijanye n’ibikorwa vy’ubutungane , igipolisi n’igisirikare na cane cane kuvyerekeye ukwubahiriza ubwigenge bw’abanyagihugu hamwe n’ubwigenge bwa politike biciye mu gukorana n’amashirahamwe yigenga hamwe n’ibimenyeshamakuru.
Uwaserukiye Leta mw’iyo nama akaba yavuze ko ako kazi k’iyo ntumwa idasanzwe ya ONU ku Burundi ko hagarara kuko ubutegetsi b’uburundi butigeze buvyemera. Kimwe muvyo Leta y’uburundi isaba kugira agateka ka zina muntu kubahirizwe akaba ari ukurwiza inyigisho n’imfashanyo zihabwa abajejwe agateka ka zina muntu mu gihugu.
Recent Comments