Imyaka itandatu irarumanye uwurongoye ishirahamwe APRODH umushingantahe Pierre-claver Mbonimpa ahatswe kugandagurwa na bamwe bari mu nzego z-umutekano . Pierre-Claver Mbonimpa iyo ari mu buhingiro ababazwa n-ukuntu ubutungane bw-uburundi ataco bwigeze bukora kugira abashatse kumwaka ubuzima bashengezwe .
ˮUbutungane ntaco burakora kugira menye abashatse kungadagura, abahatswe kungandagura ndabazi, ababishize mu ngiro ndabazi . ubutungane budakoze ku bwicanyi buzoguma buba ndanse mu gihugu, Abica abantubazoguma bigamba, Nubu nagomba kwitahira mu gihugu ariko ntahe babandi bagomba kungandagura, bamwe banyicira umwana bakiri harya ndababona ? batigeze bacibwa n-urubanza ? Abagandaguye abantu isinzi bashika ibihumbi n-ibihumbi ata rubanza baciriwe ? Ariko ku bwanje abo bose bashatse kungadagura hamwe n-ababiteguye nukuri jewe ndabagiriye ikigongwe . Ariko rero nka guma ntaka ubutungane kuko ubutungane ntibugirira ikigongwe inkozi z-ikibi‟ Niko Petero Karaveri Mbonimpa yabwiye bagenzi bacu b-iradiyo ry- ijwi ry-urwaruka Peace FM.
Uwo arongoye ishirahamwe APRODH ryiyemeje guharanira agateka ka zina muntu na cane cane akabafungwa amenyesha ko bashimye kwitura ubutungane Mpuzamakungu kuko ubutungane bw-uburundi biboneka ko butigenga. Ariko Pierre-Claver Mbonimpa afise icizere ko Umukuru w-igihugu c-uburundi ahari ubu ashoboye kugira ico afashije ku babuze ababo kuko ngo Perezida Varisito Ndayishimiye ata mabi y-ubwicanyi yigeze avurwamwo kuva umugambwe aturukamwo CNDD-FDD ushitse ku butegetsi.
Recent Comments