Urunani ADC-IKIBIRI mu makungu rwahaye ayandi mabanga akomeye umukuru w’umugambwe MSD Alexis SINDUHIJE mu bihugu vya buraya na Amerika, iyo ngingo ikaba yafashwe kuva aho arekuriwe ku kibuga c’indege Zaventem mu Bubirigi, agasubira kwidegemvya.
Pancrace Cimpaye, umuvugizi wa Sinduhije avuga ko batumye Alexis Sinduhije ko yozunguruka mu bihugu vyose vya buraya na Amerika, asaba ko amakungu yotanga amafaranga y’amatora, mu gihe abatwara Uburundi bokwemera ko abanyeporitike bose n’abatavuga rumwe n’ubutegetsi barekurirwa gukora mu mwidegemvyo.
N’aho urunani ADC Ikibiri mu makungu rwashinze ayo mabanga Alexis Sinduhije, Reta y’Uburundi ntiyakiriye neza irekurwa mu Bubirigi rya Alexis SINDUHIJE arongoye umugambwe MSD.
Firipo Nzobonariba, umuvugizi akaba n’umunyamabanga wa Reta y’Uburundi amenyesha ko Ububirigi bwakoze igikorwa cabwo, ariko akibutsa ko umutahe mpuzamakungu wo kumuhagarika uzomurindira, aho azogarukira hose mu Burundi akazotegerezwa gufatwa.
Recent Comments