Mu nama igiye guhuza abanyeporitike bose mu burundi, ibi nivyo bizovugirwamwo !

0

Ibiro vy’uwuserukira umunyamabanga mukuru w’ishirahamwe mpuzamakungu mu burundi, bari kumwe na Reta y’Uburundi batunganije inama izohuza abanyeporitike kugira barabire hamwe ibijanye n’ishirwa mu ngiro ry’ivyo biyemeje mu rupapuro rw’inzira mu nama yari yabahuje mu kwezi kwa Ntwarante umwaka w’2013, kuva ku genekerezo rya 11 gushika kurya 13.

Mw’ijambo yashikirije i Bujumbura umunsi hugururwa ibikorwa vy’inama yo kuraba aho ivyo abafasha Uburundi biyemeje i Geneve bigeze, uwuserukira umunyamabanga w’ishirahamwe mpuzamakungu ONU mu Burundi, Parfait Onanga Anyanga yari yamenyesheje ko ishirahamwe BNUB, ribifadikanijemwo na Reta y’Uburundi, bariko bategura inama yohuza abanyeporitike, kugira barabire hamwe aho ivyo biyemeje bigeze mw’ishirwa mu ngiro ry’urupapuro rw’inzira bumvikanyeko. Urwo rupapuro rw’inzira rutegekanya ko itegeko rigenga amatora rizoca ritorwa imbere y’impera z’ukwezi kwa Kigarama uwu mwaka w’2013.

Umukuru w’igihugu c’Uburundi Petero Nkurunziza, ku ruhande rwa Reta y’Uburundi, yamenyesheje ko bazokora ibishoboka vyose kugira amatora azotunganwe mu bwigenge, kandi ku mugaragaro mu mwaka w’2015.

Iyo nama izohuza abanyeporitike izotangura kuva ku munsi wa gatatu igenekerezo rya 27 Munyonyo 2013 gushika ku genekerezo rya 29 Munyonyo 2013. Iyugururwa ryoyo n’isozerwa bizobera kuri Royal Palace Hotel, ibikorwa navyo bikaba bizobandaniriza mu nyubakwa za BNUB.