Inama Nshingamasteka y’Uburundi « yiyamirije » igisabo carungikiwe Umukuru w’igihugu c’Uburundi Pierre Nkurunziza co guha ikigongwe c’agateganyo kuri « bamwe bamwe mu bakurikiranwa n’Ubutungane bivanye n’ibikorwa vyabo » bakoze mw’igeragezwa ryo gutembagaza Ubutegetsi muri Rusama 2015, niko Pascal nyabenda, umukuru w’Inama Nshingamateka y’Uburundi , yatangajje ejo ku musi wa gatanu itariki 28/04/2017.
Kuw 13 Rusama 2015, igihe Umukuru w’igihugu Pierre Nkurunziza yari i Dar Es Salaam muri Tanzania mu nama y’Abakuru b’Ibihugu vya Afrika y’Ubuseruko, hari umugwi w’abasirikare b’aba generaux bo mugisoda c’igihugu hamwe no mu Gipolisi bateguye igeragezwa ryo gutemabagaza ubutegetsi, umugambi waciye uburizwamwo haheze imisi ibiri inyuma yaho.
Pacal nyabenda amenyesha ati : « Nivyukuri, ku vyerekeye Ibiganiro bihuza Abarundi, Inama Nshingamateka irasubiyemwo ko ishigikiye ubuhuza bw’Ibihugu vya Afrika y’Ubuseruko . Twisunze itegeko 2248 ryo mu Nama y’Umutekano ya ONU , ivyo biganiro biraba gusa abashaka amahoro ».
Kuwa 27 Ruhuhuma 2017, Uwahoze ari Umukuru w’igihugu ca Tanzania, Benjamin Mkapa akongera akaba ari umuhuza mu biganiro bihuza Abarundi bishigikiwe na EAC, yarandikiye Umukuru w’igihugu Pierre Nkurunziza kugira amusabe « guha ikigongwe c’agateganyo » ku bantu bakurikiranwa n’Ubutungane kuruhara bagize mw’igeragezwa ryo gutembagaza ubutegetsi muri Rusama 2015.
Kubwa Benjamin Mkapa, Uguhabwa ikigongwa c’agateganyo ku bashatse gutembagaza ubutegetsi vyofashije mu kunyarutsa ibiganiro bihuza abarundi vyitezwe guhera mu mpera za Ruheshi 2017 twimirije.
Ariko muri Ntwarante 2017, umukuru w’igihugu yaravuze ko’ ata ruhusha afise rwo guha ikigongwe abantu bakurikiranwa n’Ubutungane’.
Pascal Nyabenda abandanya amenyesha ko ico kigongwe coba kije mu buryo butaranga ubutungane kuko bamwe bamwe mu bagerageje gutembagaza ubutegetsi bamaze gucirwa urubanza n’ubutungane kandi bakaba bariko bakora ibihano vyabo.
Kubwa Nyabenda, icoba ciza nuko abacidegemvya bari hanze mubagize uruhara mwuwo mugambi, bakwiye gutahukanwa mu Burundi hama bagacirwa imanza n’ubutungane kugira abandi ntibazosubire kugerageza gushikira ubutegetsi bakoresheje inguvu. « Uwo mugenzo waraciyemwo kubiri wongera urahekura igihugu c’Uburundi incuro zitari zike kuva Uburundi bwikukiye mu 1962 », niko Nyabenda amenyesha.
