Ferederiko Bamvuginyumvira yarekuwe vy’agateganyo

0

Frederic Bamvuginyumvira icegera c’umukuru w’umugambwe Sahwanya Frodebu akaba yarabaye n’icegera ca mbere c’umukuru w’igihugu, yarekuwe vy’agateganyo, inyuma yaho afatiwe, agapfungwa yagirizwa gushaka gutanga igiturire.


Ferederiko Bamvuginyumvira yahoze ari icegera ca mbere c’umukuru w’igihugu

Frederic Bamvuginyumvira yahoze ari icegera c’umukuru w’igihugu bivugwa ko yoba yasabwe ingwati y’imiriyoni zibiri z’amafaranga y’amarundi, kugira itegeko ryo kumurekura rifatwe. Yari yafashwe ku wa 5 Kigarama umwaka w’2013, aca ajanwa mw’ibohero rikuru rya Mpimba ku wa 9 kigarama uyo mwaka nyene. Yafashwe n’abaporisi bo mw’igendereza yagirizwa kurenga ibigo, ariko guca ajanwa mw’ibohero rya Mpimba inyuma y’iminsi ine, ariko ico caha caca kikaba cavyaye ko yashatse gutanga igiturire, mu kugiha abamufashe kugira bamureke. Abatari bake rero, yaba umuryango wiwe, abo bari mu mugambwe umwe canke abandi bo muyindi migambwe, ndetse n’abaharanira agateka ka zina muntu, n’amakungu, bakaba barasavye ko yorekurwa mu gihe abo bose bavuga ko ari irementanya yagiriwe kugira acafuzwe, mu gihe vyanurwanurwa ko ariwe yoserukiye Ikibiri mu matora yo mu mwaka w’2015.

Ferederiko Bamvuginyumvira akaba amagara yiwe yari amaze iminsi amukitse, ndetse bikaba vyaranashitse aho, atitaba intahe, yitavye naho, akaburana yicaye. Ku wa 20 Kigarama umwaka uheze, Ferederiko Bamvuginyumvira bikaba vyaravuzwe ko yagira arekurwe, ariko mu nyuma, hakaba hari amategeko kugeza n’ubu atawuramenya iyo yaje azanana, yabuza uwo munyacubahiro guhabwa uburenganzira bwo kwidegemvya mu biwe no mu vyiwe.

Kuri uyu muhingamo w’igenekerezo rya 20 Ntwarante, bimaze kumenyekana ko yarekuwe, ubutumwa bw’abantu batandukanye bukaba ari bwinshi ku buhinga ngurukanabumenyi bwa facebook, aho abantu batandukanye bariko barasaba ko n’abandi bapfunzwe borekurwa. Muri ubwo butumwa, tukaba twashoboye gusoma ubwanditswe na Pacifique Nininahazwe asanzwe arongoye ishirahamwe FOCODE, aho asaba ko n’abandi banyeporitike bapfunzwe bazira ivyiyumviro vyabo bitandukanye n’ivyabatwara, borekurwa.

Aha akavuga nka Hussein Radjabu, Misago Edouard batazira Fundi wo mu mugambwe FNL urongowe na Agathon Rwasa, n’abanywanyi b’umugambwe MSD baheruka gufatirwa mu ngoro y’uwo mugambwe hamwe n’abandi, ndetse bamwe muri bo, bagasabirwa umunyororo wo gupfungwa ubuzima bwose.


Hussein Radjabu yahoze arongoye umugambwe CNDD FDD