NEWS

Umugambwe mushasha wa RWASA Agathon

By

on

RWASA Agathon, icegera ca mbere c’umukuru w’inama nshingamateka y’Uburundi yandikiye umukuru w’igisagara ca Bujumbura, amumenyesha ko ategekanya gukoresha inama ya poritike kuri uwu wa gatatu, mu gisagara ca Bujumbura, mu nyubakwa za OPDE ziri kw’ibarabara bitiriye irya 28 Munyonyo.

Nk’uko biri muri iryo kete Agathon RWASA yandikiye Freddy MBONIMPA, umukuru w’igisagara ca Bujumbura, intumbero y’iyo nama ni iyo gutanguza umugambwe mushasha urongowe na Agathon RWASA.

Izina ry’uwo mugambwe ntirirashirwa ahabona, Agathon RWASA akaba yasavye abajejwe umutekano hamwe n’ubuyobozi bw’igisagara ca Bujumbura ko bomworohereza muri iyo nama izoba yatumiwemwo n’abandi bayoboke b’uwo yahora arongoye urunani rw’Abigenga AMIZERO Y’ABARUNDI.

Ibijanye n’uwo mugambwe mushasha hamwe n’ingene iyo nama izoba yagenze, turabigarukako mu makuru yacu yo hanyuma.

Tubibutse ko ibwirizwa shingiro rishasha ryatowe kw’igenekerezo rya 17 Rusama 2018 ritavuga ikibanza c’inani mu burongozi bw’igihugu. Abakurikiranira hafi ivya poritike bari bamaze iminsi bashikiriza ko inyuma y’amatora y’umwaka w’2020, Agathon RWASA azoba asezeye poritike y’Uburundi, kuko ibwirizwa shingiro ata kibanza riha urunani AMIZERO Y’ABARUNDI.

Uwo mugambwe agira atanguze woba ariwo mukenyuro mushasha wa Agathon RWASA w’ukurondera ingene azohiganirwa ikibanza c’umukuru w’igihugu mu mwaka w’2020? Turabigarukako hanyuma.

Recommended for you