Mu gihe hamaze imisi havurwa urukurukuru rujanye nuko amagara y-umushikiranganji wa mbere yoba atifashe neza, Umukuru w-igihugu c-uburundi Perezida Varisito Ndayishimiye aheruka gutera umukono kw-itegeko riha uruhusha umushikiranganji w-intwaro yo hagati mu gihugu rwo kurongora inama nshikiranganji hamwe no gukurikiranira hafi ibikorwa vya Leta mu gihe umushikiranganji wambere yoba afatiriwe.
Abarabira hagufi politike y-uburundi babona ko iryo tegeko rije gushira ahabona umuco ku bibazo n-amakenga abarundi batari bake bari bamaze imisi bibaza ku bijanye naho umushikiranganji Alain-Guillaume Bunyoni yoba ari inyuma yo kutaboneka ku bikorwa guhera kuwa 19 Mukakaro 2021. Bikaba bigiye gusigura ko mukurindira ko Alain-Guillaume Bunyoni asubira kuboneka , umushikiranganji w-intwaro yo hagati mu gihugu Gervais Ndirakobuca ariwe agiye guca aba ararongora ibikorwa vya Leta harimwo no gutegura ibikorwa vy-inama nshikiranganji .
Tubamenyeshe ko Umushikiranganji wa mbere Alain-Guillaume Bunyoni aheruka kuboneka kuwa 19 Mukakaro 2021 mugihe yariko arongora inama itegura inama nshikiranganji. Kuva ico gihe ntamakuru ajanye n-ubuzima bwiwe arigera atangazwa canke ngo hamenyeshwe ivyo yoba arimwo. Ivyo bikaba bishitse mu gihe hari amakuru aguma avurwa na bamwe mu bagumyabanga b-umugambwe CNDD-FDD yemeza ko Perezida Ndayishimiye ariko agomba ukuntu yiyambura akarwi kamwe k-ibihangange mw-uwo mugambwe kica kakongera kagakiza arivyo bigiye gutuma hashobora kuba ihindurwa rya Leta irongowe na Alain-Guillaume, bisigura ko nawene bizoca bijana nayo hama hashingwe iyindi Leta irongowe n-uyundi muntu azoba ari somambike na Perezida Varisito Ndayishimiye.
