Tue. Jan 28th, 2020

CNARED yasabiye ibihano bikomeye ubutegetsi bw’i Bujumbura

Mu gihe ibiganiro hagati ya Reta y’Uburundi hamwe n’abatavuga rumwe nayo bisa n’ivyahagaze bitumwe na Reta ititavye isango ry’ibiganiro vyari bitegekanijwe kw’igenekerezo rya 6 Nzero 2016 i Arusha muri Tanzaniya, mu runani CNARED basaba ko inama nkuru y’umutekano y’ishirahamwe mpuzamakungu ONU yofatira ibihano Reta y’Uburundi, kandi ko inteko mvamakungu zorungikwa ku nguvu mu Burundi.

nyangoma
Nyangoma Leonard, umukuru w’urunani CNARED

Mu runani CNARED bibutsa ko Inama nkuru y’umutekano y’ishirahamwe mpuzamakungu ONU yabonanye n’ubutegetsi bw’i Bujumbura ku magenekerezo ya 21 na 22 Nzero 2016, ariko ko aho hose Reta y’Uburundi yiyamirije ivyasabwe ko hoba ibiganiro bihuza Reta n’abatavuga rumwe nayo, ko horungikwa inteko mvamakungu gukingira abanyagihugu, hamwe n’uko hokorwa amatohoza ku bantu bicwa, bagahabwa mu binogo rusangi.

Mu gihe ivyasabwe vyose vyanse, mu runani CNARED basaba inama nkuru y’umutekano ya ONU, hamwe n’inama y’abakuru b’ibihugu biri mw’ishirahamwe ry’ubumwe bwa Afrika, ko bofatira ibihano ubutegetsi bw’i Bujumbura, n’inteko mvamakungunzikarungikwa mu Burundi ku nguvu.

Mu runani CNARED bakebura amakungu ko atosamara, kuko ibiriko biraba mu Burundi bishobora kuzokwira mu karere kose mu gihe atacokorwa, bagatanga akarorero ka Repuburika iharanira intwaro rusangi ya Congo n’Urwanda, ibihugu bisanzwe biriko birategura amatora. Mu gihe naho amakungu atotabara abarundi, muri CNARED bavuga ko atawotangara abanyagihugu ubwabo bafashe ingingo y’ukwirwanira.

Mu kiganiro cabaye kuri uwu wa kane igenekerezo rya 28 Nzero 2016 muri Hôtel Marivaux iri mu gisagara ca Bruxelles, urunani CNARED rwibukije ko inzira y’ibiganiro ariyo yonyene izotora umuti w’ibibazo vya poritike bihanze Uburundi. Muri ivyo biganiro bisabwa, CNARED ikaba izogaruka cane cane ku kungene hoshirwaho intwaro mfatakibanza.