NEWS

Abatavuga rumwe na leta basavye ko Ibwirizwa-Shingiro ‘rishasha’ rifutwa hamwe na ‘CENI nshasha’.

on

Mu gihe ibiganiro bihuza abarundi ariko bititabwe na leta vyaraye bisozerewe i Arusha muri Tanzania, abatavuga rumwe na leta bashikirije umuhuza ivyo basaba kugira amatora ya 2020 azokunde.

Nk’uko tubikesha Iradiyo y’Abongereza BBC, abo banyepolitike bashikirije umufasha w’umuhuza, Benjamin Mkapa, icegeranyo c’ivyo basaba birimwo ifutwa ry’ibwirizwa shingiro rihinyanyuye riheruka kwemezwa hamwe n’ifutwa ry’umugwi ujejwe amatora.

Basavye kandi ko hakurwako imitahe yo gufata abantu barenga 30 yasohowe na leta y’u Burundi, ibagiriza kugira uruhara mu migumuko nu kugerageza gutembagaza ubutegetsi mu 2015.

Ifoto yafashwe na BBC

Ikindi abo banyepolitike batavuga rumwe na leta y’u Burundi basaba, ni itahuka ry’impunzi zahunze amagume yo mu 2015, izishika 450.000.

Umuhuza Mkapa yavuze ko agiye kwihweza ico cegeranyo, agifadikanye n’icegeranyo c’imigambwe iri ku butegetsi n’iyo bicuditse casohorewe mu Kayanza i Burundi.

Azoca agira icegeranyo rusangi azoshikiriza umuhuza mukuru w’ibiganiro, Perezida Yoweri Museveni.

Umufasha w’umuhuza David Kapya yabwiye abamenyeshamakuru ko Prezida Museveni n’abakuru b’ibihugu b’akarere ari bo bazoshikiriza ingene ibiganiro ku matati y’abarundi bizobandanya.

Mkapa kandi yamenyesheje ko igikorwa yasabwe kurangura kirangiriye kuri bino biganiro vyo ku ncuro ya gatanu i Arusha.

Recommended for you