Igitigiri kitari gito c-abanyeshure b-abarundi (bari ku rugero rwa 80%) bagiye kwiga muri kaminuza ya Toulouse, iri mu gihugu c-ubufaransa mu mwaka wa 2021 baciye bihutira gusaba ubuhungiro mw-ico gihugu maze ivyo kwiga baba barabivuyemwo. Ivyatumye abandi banyeshure bagenzi babo bo mu mwaka w-ishure wa 2022 bari basavye kuja kwiga mw-iyo Kaminuza bahava nka bose bankirwa kuja kwiga.
Nkuko tubikesha ikinyamakuru JIMBERE MAGAZINE, ikigo co mu gisagara ca Toulouse gikurikirana ibijanye n-uruja n-uruza , OFII (office français de l-immigration et de l-integration) cahavuye gifata ingingo yo guhagarika ivy-imfatakibanza agafashanyo gasanzwe gahabwa abanyagihugu basaba ubuhungiro mw-ico gihugu. Abagiye barashika mu nyuma gusaba ubuhungiro bakaba bobo atako bigeze baronswa. Bikavurwa iyo ngingo yakozeko cane uwo murwi w-abo banyeshure basavye ubuhungiro mw-ico gihugu. Ayo makuru akaba anemezwa kandi na Fabrice Ndihokubwayo asanzwe arongoye ishirahamwe ry-urwaruka rw-abarundi rutuye mu bihugu vy-ubufaransa, Espagne, Monaco na Portugal.
Uwo arongoye urwo rwaruka rw-abarundi rutuye mw-ivyo bihugu twavuze hejuru yiganira JIMBERE MAGAZINE ko abo banyeshure b-abarundi bavyitwayemwo nabi ndetse baraniyononera kuko ngo uhejeje kwiga mw-ico gihugu ushobora guhabwa akazi aho nyene ndetse vyoroshe cane , aho mbere ngo usanga hariho ubuzi bwitwa bwagenewe gukorwa n-abanyeshure gusa kuburyo atawundi muntu bobuha.«mwene ubwo buzi ni bwinshi cane ntushobora kububura» Niko Ndihokubwayo abandanya asigura.
